അങ്കണവാടികള്‍
അങ്കണവാടികൾ / സംയോജിത ശിശു വികസന സേവന പദ്ധതി (ICDS)
അമ്മയുടെയും കുഞ്ഞിന്റെയും സമഗ്ര വികസനത്തിനായി
സ്ത്രീകളുടെയും കുട്ടികളുടെയും സമഗ്ര വികസനം ലക്ഷ്യമിട്ട് ഇന്ത്യാ ഗവൺമെന്റ് നടപ്പിലാക്കി വരുന്ന പ്രധാന പദ്ധതിയാണ് സംയോജിത ശിശു വികസന സേവന പദ്ധതി (Integrated Child Development Services - ICDS). അങ്കണവാടികളിലൂടെ ഗർഭിണികൾ, മുലയൂട്ടുന്ന അമ്മമാർ, 0 മുതൽ 6 വയസ്സ് വരെയുള്ള കുട്ടികൾ, കൗമാരപ്രായക്കാരായ പെൺകുട്ടികൾ എന്നിവർക്ക് വിവിധ സേവനങ്ങൾ ലഭ്യമാക്കുന്നു.
പദ്ധതിയുടെ ലക്ഷ്യങ്ങൾ
- 0 മുതൽ 6 വയസ്സ് വരെയുള്ള കുട്ടികളുടെ പോഷകാഹാര നില മെച്ചപ്പെടുത്തുക.
- കുട്ടികളുടെ ശാരീരിക, മാനസിക, സാമൂഹിക വളർച്ച ഉറപ്പാക്കുക.
- ശിശുമരണനിരക്കും പോഷകാഹാരക്കുറവും കുറയ്ക്കുക.
- ഗർഭിണികളുടെയും മുലയൂട്ടുന്ന അമ്മമാരുടെയും ആരോഗ്യനില മെച്ചപ്പെടുത്തുക.
- സ്കൂൾ പ്രവേശനത്തിന് മുമ്പുള്ള പ്രീ-സ്കൂൾ വിദ്യാഭ്യാസം നൽകുക.
- ആരോഗ്യം, പോഷണം, ശുചിത്വം എന്നിവയെക്കുറിച്ച് കുടുംബങ്ങളെ ബോധവൽക്കരിക്കുക.
അങ്കണവാടികളിലൂടെ ലഭ്യമാക്കുന്ന സേവനങ്ങൾ
| വിഭാഗം | ലഭ്യമാക്കുന്ന സേവനങ്ങൾ |
|---|---|
| 6 മാസം മുതല്‍ 3 വയസ്സ് വരെയുള്ള കുട്ടികൾ | അനുപൂരക പോഷകാഹാരം, അമൃതം ന്യൂട്രിമിക്‌സ്, സമയബന്ധിതമായ പ്രതിരോധ കുത്തിവയ്പ്പുകൾ, വളർച്ചാ നിരീക്ഷണം, ആരോഗ്യ പരിശോധന എന്നിവ. |
| 3 വയസ്സ് മുതൽ 6 വയസ്സ് വരെയുള്ള കുട്ടികൾ | അനുപൂരക പോഷകാഹാരം, സമയബന്ധിതമായ പ്രതിരോധ കുത്തിവയ്പ്പുകൾ, പ്രീ-സ്കൂൾ വിദ്യാഭ്യാസം, ആരോഗ്യ പരിശോധന, വളർച്ചാ നിരീക്ഷണം എന്നിവ. |
| ഗർഭിണികൾ | അനുപൂരക പോഷകാഹാരം, ആസൂത്രിത ഗർഭധാരണം, പ്രതിരോധ കുത്തിവയ്പ്പ്, ഗർഭകാല പരിശോധന, പോഷക-ആരോഗ്യ ബോധവൽക്കരണം എന്നിവ. |
| മുലയൂട്ടുന്ന അമ്മമാർ | അനുപൂരക പോഷകാഹാരം, പ്രസവാനന്തര പരിശോധന, ആരോഗ്യ-പോഷക ബോധവൽക്കരണം, ശിശുപരിപാലന നിർദ്ദേശങ്ങൾ എന്നിവ. |
| കൗമാരക്കാരായ കുട്ടികൾ | കൗമാര പ്രായക്കാരായ പെൺകുട്ടികൾക്ക് അനുപൂരക പോഷകാഹാരം, ആരോഗ്യ പരിശോധനയും പരാമർശ സേവനവും, വളർച്ച നിരീക്ഷ BMI/വിളർച്ച നിർണയം, കൗമാരക്ലാസ്/കൗമാര ക്ലബുകൾ, സ്കൂൾ കൊഴിഞ്ഞു പോക്ക് തടയുക, സൈക്കോ സോഷ്യൽ കൗണ്‍സിലറുടെ സേവനം. |
പ്രധാനമന്ത്രി മാതൃവന്ദന യോജന (PMMVY)
ഗർഭിണികളുടെയും മുലയൂട്ടുന്ന അമ്മമാരുടെയും ആരോഗ്യ സംരക്ഷണവും പോഷകാഹാര നിലവാരം മെച്ചപ്പെടുത്തുന്നതിനുമായി കേന്ദ്ര സർക്കാർ നടപ്പിലാക്കുന്ന ധനസഹായ പദ്ധതിയാണ് പ്രധാനമന്ത്രി മാതൃവന്ദന യോജന (PMMVY).
- ആദ്യത്തെ ജീവനുള്ള കുഞ്ഞിനായി ധനസഹായം ലഭ്യമാണ്.
- ഗർഭകാല രജിസ്ട്രേഷൻ, ആരോഗ്യ പരിശോധന, പ്രതിരോധ കുത്തിവയ്പ്പ് എന്നിവ പ്രോത്സാഹിപ്പിക്കുന്നു.
- അർഹരായ ഗർഭിണികൾക്ക് നിബന്ധനകൾക്ക് വിധേയമായി സാമ്പത്തിക സഹായം ലഭിക്കും.
- ആദ്യ പ്രസവത്തിന് 5000 രൂപ സഹായം,
രണ്ടാമത്തേത് പെൺകുട്ടിയാണെങ്കിൽ 6000 രൂപ സഹായം.
പോഷൺ അഭിയാൻ (Poshan Abhiyaan)
ഇന്ത്യയിലെ കുട്ടികൾ, സ്ത്രീകൾ, കൗമാരപ്രായക്കാരായ പെൺകുട്ടികൾ എന്നിവരിലെ പോഷകാഹാരക്കുറവ് കുറയ്ക്കുന്നതിനായി ആരംഭിച്ച ദേശീയ പോഷണ ദൗത്യമാണ് പോഷൺ അഭിയാൻ.
- പോഷകാഹാരക്കുറവ്, വളർച്ചാ മുരടിപ്പ്, വിളർച്ച എന്നിവ കുറയ്ക്കുക.
- ഗർഭിണികളുടെയും മുലയൂട്ടുന്ന അമ്മമാരുടെയും പോഷക നില മെച്ചപ്പെടുത്തുക.
- ജനപങ്കാളിത്തത്തോടെ പോഷകാഹാര ബോധവൽക്കരണം ശക്തിപ്പെടുത്തുക.
അടിയന്തര സഹായ നമ്പറുകൾ
| സേവനം | ഹെൽപ് ലൈൻ നമ്പർ |
|---|---|
| ചൈൽഡ് ലൈൻ (Childline) | 1098 |
| വനിത ഹെൽപ്പ് ലൈൻ (Women Help Line) | 181 |
ശ്രദ്ധിക്കുക: കുട്ടികളുടെയും സ്ത്രീകളുടെയും സുരക്ഷയുമായി ബന്ധപ്പെട്ട അടിയന്തര സാഹചര്യങ്ങളിൽ മുകളിൽ നൽകിയിട്ടുള്ള ഹെൽപ് ലൈൻ നമ്പറുകളിൽ ബന്ധപ്പെടാവുന്നതാണ്.
